Mistök Samfylkingarinnar voru að fylgja ekki eigin sannfæringu

 

Ingibjörg Sólrún Gísladóttir, fráfarandi formaður Samfylkingarinnar, sagði í setningarræðu í upphafi landsfundar í dag að flokkurinn hafi gert mistök með því að fylgja ekki eigin sannfæringu. Hún sagðist hafa líkt og margir aðrir sýnt ákveðið andvaraleysi gagnvart samfélagsþróuninni. En sem aðili að síðustu ríkisstjórn hafi hún staldrað við tvennt öðru fremur.

Í fyrsta lagi telur Ingibjörg að hennar stærsta yfirsjón hafi verið að gera ekki mun afdráttarlausari kröfur um breytingar á stjórnkerfinu þegar Samfylkingin efndi til samstarfs við Sjálfstæðisflokkinn vorið 2007. „Breytingar sem hefðu tryggt meiri fagmennsku, gagnrýni og gagnsæi í stjórnkerfinu. Í Sjálfstæðisflokknum fer auðvald og ríkisvald hönd í hönd. Hér ríkir kunningjakapítalismi."

Ný forysta Sjálfstæðisflokksins sló ryki í augu Ingibjargar

Ingibjörg sagðist hafa margítrekað þetta í opinberri umræðu á liðnum árum. Þessvegna hafi hún átt að vita þetta. „Það sem sló hins vegar ryki í augu okkar voru þær mannabreytingar sem þá höfðu orðið í forystu flokksins. Nýir og geðþekkari einstaklingar höfðu tekið við stjórninni og við bundum vonir við þá. Við horfðum framhjá því við stjórnarmyndunina að vandamálið er ekki fólkið heldur flokkurinn."

Önnur yfirsjón er að hafa ekki gert kröfu um miklu fastara og ákveðnara taumhald á aðgerðum ríkisins strax og Glitnismálið kom upp. Ingibjörg sagði að aðgerðirnar hafi verið of fálmkenndar, upplýsingar hafi verið af skornum skammti og framkvæmd hafi tekið alltof langan tíma.

„Þetta vil ég endilega segja hér, ekki vegna þess að ég telji mig þannig geta fullnægt formsatriði sem gerir mér kleift að kasta syndunum bakvið mig og hafa jafnvel af því pólitískan ávinning, heldur vegna þess að það er mín skoðun að við verðum að horfast í augu við að þarna liggi hin pólitíska ábyrgð Samfylkingarinnar gagnvart samfélaginu og mín þar með. Við fylgdum ekki nógu fast eftir okkar eigin sannfæringu um nauðsynlegar umbætur, við fylgdum ekki orðum eftir með athöfnum, við létum gildismat Sjálfstæðisflokksins og viðskiptalífsins yfir okkur ganga og súpum nú seyðið af því ásamt með þorra þjóðarinnar," sagði Ingibjörg.

Tóku fagnandi brauðmolum sem hrutu af borðum auðmanna

Ingibjörg sagði hafa hugsað mikið um atburði haustsins og reynt að skilja það siðrof sem varð í íslensku samfélagi þegar ákveðinn hópur manna hætti að sækja sér viðmið í íslenskan veruleika, tók upp lífshætti erlendra auðmanna og gaf goðsögninni um stéttlaust samfélag á Íslandi langt nef.

„Svo er ég enn að reyna að komast til botns í því hvers vegna íslenskt samfélag gekkst inn á þetta, þó að ekki væri nema með þegjandi þögninni eða með því að taka fagnandi þeim brauðmolum sem hrutu af borðum auðmannanna - og má þá einu gilda hvort í hlut áttu rithöfundar, leikhúsfólk, stjórnmálamenn, fjölmiðlamenn, sveitarstjórnarmenn, skólamenn eða aðrir framámenn í samfélaginu," sagði Ingibjörg.

Samstarfið við sjálfstæðismenn var ekki bara slæmt



Ingibjörg sagði að hafa verið í huga að samstarf Samfylkingarinnar og Sjálfstæðisflokks stóð aðeins í 18 mánuði. Samfylkingin hafi að sjálfsögðu ætlað nota að minnsta kosti fjögur ár til að ná fram breytingum sem skipti máli. Pólitískum kúltúr og stofnunum verð ekki breytt eins og hendi sé veifað. Til þess þurfi tíma og sagðist Ingibjörg þekkja það frá tíma sínum í Reykjavíkurborg.

„Samstarfið við Sjálfstæðisflokkinn var þó ekki bara slæmt og mikilvægt er að hafa í huga að margvíslegar réttarbætur náðu fram að ganga," sagði Ingibjörg.

Ísland í hópi tíu samkeppnishæfustu þjóða fyrir 2020



Ingibjörg sagði að meðal þeirra brýnu verkefna sem ný ríkisstjórn þurfi að hrinda í framkvæmd væri heildstæð sóknarstefna fyrir íslenskt atvinnulíf þar sem stefnan verði tekin á að Ísland verði komið í hóp tíu samkeppnishæfustu þjóða heims fyrir 2020. Um leið verði að fylgja metnaðarfullri félagslegri jafnaðarstefnu, sem hafi það að markmiði að tryggja að allir landsmenn hafi lágmarksframfærslu.

„Þessum markmiðum verður erfitt að ná og halda meðan við búum við þær sveiflur sem fylgja okkar litla gjaldmiðli. Þessvegna verður ekki lengur undan því vikist að marka nýja peningamálastefnu með samningum við Evrópusambandið. Strax í upphafi aðildarviðræðna er hægt að leita samvinnu við ESB um aðgerðir til að auðvelda afnám gjaldeyrishafta og styðja við verðmyndun krónunnar.Ég hef á undanförnum mánuðum rætt stöðu Íslands ítarlega í einkasamtölum við utanríkisráðherra helstu ríkja Evrópusambandsins og hef skynjað ríkan áhuga á aðild okkar. Þrátt fyrir allt þá er lag núna," sagði Ingibjörg.

 

 

Hægt er að fylgjast með setningu fundarins í beinni á heimasíðu Samfylkingarinnar.