Mikilvægt að kínverski gjaldmiðillinn haldist stöðugur

Forsætisráðherra Kína, Wen Jiabao, þvertekur fyrir að Kínverjar haldi gengi gjaldmiðils síns vísvitandi lágu til þess að ýta undir útflutning frá landinu. Hann segir það mjög mikilvægt fyrir efnahagslegan stöðugleika í heiminum að halda gengi yuansins stöðugu.

Þetta kom fram í ræðu Wen í kínverska þinginu í gær. Í máli hans kom einnig fram að Bandaríkjunum væri um að kenna að samskipti ríkjanna hefðu farið versnandi undanfarið. Hann benti á vopnasölu þeirra til Tævan og heimsókn Dalai Lama í Hvíta húsið máli sínu til stuðnings.