JP Morgan fær risasekt í Bretlandi

3. júní 2010 10:44

Breska fjármálaeftirlitið (FSA) hefur skellt risavaxinni sekt á JP Morgan Securites. Sektarupphæðin nemur 33,3 miljónum punda eða um 6,3 milljörðum kr. Í frétt um málið á BBC segir að þetta sé hæsta sekt sinnar tegundar í sögu Bretlands.

FSA sektar JP Morgan sökum þess að bankinn blandaði saman fjármunum viðskiptavina sinn við eigin fjármuni á síðustu sjö árum og gætti þar með ekki nægilega hagsmuna viðskiptavinanna.

Samkvæmt reglum FSA ber fjármálastofnunum að halda fjármunum viðskiptavina sinna aðskildum í sérstökum sjóðum til að verja viðskiptavinina gegn gjaldþrotum. Fram kemur að starfhættir JP Morgan hvað þetta varðar voru ekki með vilja gerðir og engir viðskiptavinir töpuðu á þeim.

Talsmaður JP Morgan segir að bankinn hafi unnið að lausn málsins í samvinnu við FSA. Sökum þessa veitti FSA bankanum 30% afslátt á sektinni en upphaflega hljóðaði hún upp á 47,6 milljónir punda.

Margaret Cole yfirmaður fjármálaglæpadeildar FSA segir að starfshættir JP Morgan hafi verið alvarlegt brot á reglum FSA. Sektarupphæðin sendi öðrum fjármálafyrirtækjum skilaboð um að slíkt verði ekki liðið. Þá boðar Cole að JP Morgan sé ekki eina fjármálafyrirtækið sem hljóti sektir vegna sambærilegra brota.