Tiger Woods hrapar eins og steinn niður heimslistann

Kylfingar frá Evrópu eru í fjórum efstu sætunum á heimslistanum í golfi og það hefur ekki gerst frá 15. mars árið 1992. Tiger Woods hefur hrapað eins og steinn niður heimslistann á síðustu 12 mánuðum en hann er nú í fimmta sæti. Martin Kaymer frá Þýskalandi er efstur en hann er aðeins annar Þjóðverjinn sem nær þessum áfanga.

Englendingarnir Lee Westwood og Luke Donald eru í öðru og þriðja sæti. Norður-Írinn Graeme McDowell er fjórði, Tiger Woods í því fimmta og Phil Mickelson í sjötta.

Landi Kaymer, Bernhard Langer, var fyrsti kylfingurinn í sögunni sem fékk efsta sæti heimslistans þegar listinn var settur á laggirnar árið 1986.

Aðeins 14 kylfingar hafa náð efsta sæti heimslistans frá árinu 1986 en Woods hefur nánast einokað það sæti undanfarin ár – líkt og Greg Norman gerði á árunum 1986-1998.

Eftirtaldir kylfingar hafa náð efsta sætinu og í sviganum er fjöldi þeirra vikna sem þeir sátu í efsta sætinu: Tom Lehman frá Bandaríkjunum fékk ekki langan tíma í þessu sæti árið 1997 en hann var aðeins í eina viku í efsta sætinu:

Bernhard Langer (Þýskaland) 1986 (3 vikur)

Seve Ballesteros (Spánn) 1986 – 1989 (61 vika)

Greg Norman (Ástralía) 1986 – 1998 (331 vikur)

Nick Faldo (England)1990 – 1994 (97 vikur)

Ian Woosnam (Wales) 1991 – 1992 (50 vikur)

Fred Couples (Bandaríkin) 1992 (16 vikur)

Nick Price (Zimbabwe) 1994 – 1995 (44 vikur)

Tom Lehman (Bandaríkin) 1997 (1 vika)

Tiger Woods (Bandaríkin) 1997 – 2010 (623 vikur)

Ernie Els (Suður-Afríka) 1997 – 1998 (9 vikur)

David Duval (Bandaríkin) 1999 (15 vikur)

Vijay Singh (Fijí)2004-2005 ( 32 vikur)

Lee Westwood (England) 2010 (17 vikur)

Martin Kaymer (Þýskaland) 2011