ERT er valdamesti viðskiptaklúbbur Evrópu

Valdamesti viðskiptaklúbbur Evrópu ber nafnið European Round Table of Industrialists (ERT). Klúbburinn samanstendur af 45 af háttsettustu forstjórum á sviði iðnaðar og framleiðslu í Vestur Evrópu og þegar hann tjáir sig er hlustað á það með með athygli af helstu stjórnendum ESB.

Fjallað er um klúbbinn í Berlingske Tidende en hann heldur tvo fundi á hverju ári og er sá fyrri þeirra framundan. Einn Dani á aðild að klúbbnum, það er forstjóri A.P. Möller-Mærsk. Raunar eiga öll Norðurlöndin, fyrir utan Ísland, sína fulltrúa í ERT og raunar eru tveir Finnar meðlimir klúbbsins.

Fulltrúi Svía er fjárfestirinn Jacob Wallenberg en hann er sá eini af meðlimum ERT sem ekki er forstjóri stórfyrirtækis.

Hlutfallslega flestir meðlimir ERT koma frá Bretlandi, Þýskalandi, Frakklandi og Ítalíu.

ERT var stofnaður árið 1983 þegar forstjórar frá 17 af stærstu iðnaðarfyrirtækjum Evrópu komu saman til að ræða málin. Þá voru efnahagsaðstæður í Evrópu verulega slæmar eftir olíukreppuna á áttunda áratugnum og atvinnuleysi mikið. Síðan þá hefur þessi klúbbur vaxið og aukið áhrif sín.