Tvöfaldur sigur hjá GR

Golfklúbbur Reykjavíkur vann sigur í karla- og kvennaflokki í Sveitakeppni GSÍ sem fram fór um helgina Þetta er annað árið í röð sem GR vinnur tvöfalt.

Karlasveit GR lagði sveit Golfklúbbs Kópavogs og Garðabæjar 3-2 í úrslitum í Sveitakeppninni á Leirdalsvelli í Garðabænum í gær. Hvort lið vann tvær viðureignir í tvímenningi þar sem leikin er holukeppni maður gegn manni. Í fjórmenningi, þar sem tveir leika gegn tveimur, hafði GR betur í bráðabana eftir að staðan var jöfn að loknum 18 holum.

„Það er frábært afreksstarf í gangi hjá GR. Ég er orðinn næstelstur í þessu lið þótt ég sé bara 26 ára. Við erum með marga mjög góða unga stráka sem eru að spila frábærlega,“ sagði Stefán Már Stefánsson liðsmaður GR sem lék í fjórmenningnum í gær ásamt Arnóri Inga Finnbjörnssyni.

Stefán Már segir úr góðum hópi kylfinga að velja hjá GR og því sé hörkusamkeppni að tryggja sér sæti í sveitinni.

Kvennasveit GR mætti Golfklúbbnum Keili í úrslitum á Hvaleyrarvelli. Líkt og í karlaflokki voru leikar jafnir að loknum fjórum viðureignum í tvímenningi. Á 19. holu í fjórmenningnum tryggðu stelpurnar í GR sér sigur.

„Þetta var mjög stressandi. Ég var alveg að fara á taugum á tímabili,“ sagði Hildur Kristín Þorvarðardóttir sem tryggði GR-stelpunum sigur í fjórmenningnum ásamt Írisi Kötlu Guðmundsdóttur. Þetta er annað árið í röð sem GR leggur GK að velli í úrslitum Sveitakeppninnar.

„Mér fannst skemmtilegra að vinna þetta núna af því að það voru ekki allar Keiliskonurnar með í fyrra. Núna sýndum við öllum að við gætum þetta,“ sagði Hildur Kristín.