Daníel Laxdal: Var alveg sama hvað lið við myndum fá

„Ég er mjög ánægður með að fá heimaleik, en við höfum verið á heimavelli fram til þessa í keppninni. Mér var alveg sama hvaða lið við myndum fá," sagði Daníel Laxdal leikmaður Stjörnunnar eftir að ljóst var að liðið fær 1. deildarlið Þróttar í undanúrslitum Borgunarbikarsins.

„Þróttur var slakasta liðið af þeim sem eftir voru, ég ætla ekki að vera með nein leiðindi en þeir eru í næst eftstu deild. Þetta verður hörkuleikur samt sem áður. Það er engin pressa á þeim, bara á okkur, en bæði lið eiga flotta stuðningsmenn, og þetta verður flottur leikur," sagði Daníel í dag.