Meistararnir hófu tímabilið á tapi

Nýtt tímabil hófst í NFL-deildinni í gær og byrjuðu meistararnir í New York Giants á því að tapa fyrir Dallas Cowboys í opnunarleik tímabilsins.

Kevin Ogletree varð óvænt stjarna leiksins en hann skoraði tvö snertimörk í nokkuð þægilegum sigri Dallas, 24-17. Miles Austin skoraði einnig snertimark fyrir Dallas.

Dallas hefndi þar með fyrir ófarirnar þegar að liðið tapaði fyrir Giants á lokadegi tímabilsins í fyrra. Giants komst áfram í úrslitakeppnina með sigrinum og varð síðan meistari. Dallas sat hins vegar eftir með sárt ennið eftir að miklar væntingar voru gerðar til liðsins.

Tony Romo kastaði samtals 307 jarda í leiknum og fyrir þremur snertimörkum. Eli Manning og félagar hans í Giants náðu sér hins vegar illa á strik gegn sterkri vörn Dallas.

Keppni í NFL-deildinni heldur áfram um helgina.