Frábær lokahringur tryggði Poulter sigurinn

Ian Poulter vann frábæran sigur á HSBC Champions-mótinu sem lauk í Kína í dag en mótið er hluti af Heimsmótaröðinni. Poulter tryggði sér sigurinn með frábærum lokahring en hann spilaði síðustu átján holurnar á 65 höggum eða sjö undir pari.

Það reiknuðu fæstir með sigri Poulter fyrir lokahringinn þegar hann var fjórum höggum á eftir Lee Westwood og Louis Oosthuizen sem deildu efsta sætinu. Kapparnir náðu hins vegar aðeins pari á lokahringnum og deildu þriðja sæti á meðan Poulter stal senunni.

Með sigrinum tókst Poulter að fylgja á eftir frábærri frammistöðu með liði Evrópu í Ryder-bikarnum á dögunum. Mikið hefur verið ritað og rætt um hvers vegna Poulter þrífist betur í liðakeppni eða holukeppni en hefðbundnum höggleik. Poulter fór yfir það með fréttamönnum eftir sigurinn í Kína.

„Fólk spurði mig ítrekað (eftir Ryder-bikarinn) hvers vegna ég gæti ekki staðið mig svona vel vikulega í höggleiknum. Þetta snýst um að mæta til leiks fullkomlega meðvitaður um hvað þarf gera, þekkja völlinn og vera ákveðinn. Þannig gekk ég til verks hér. Ég hef verið ákveðinn í höggunum og sett niður pútt á réttum tímum," sagði Poulter.

Með sigrinum varð Poulter aðeins annar Englendingurinn til þess að vinna tvo sigra á Heimsmótaröðinni í golfi. Englendingurinn viðurkenndi að Ryder-bikarinn hefði gefið honum sjálfstraust.

„Ég þarf að nýta mér sjálfstraustið úr Ryder-bikarnum eins vel og ég mögulega get í höggleiknum. Það gekk í þessari viku og vonandi heldur það áfram í lengri tíma," sagði Poulter sem hlaut 1,2 milljónir dollara eða sem nemur rúmum 150 milljónum íslenskra króna í verðlaunafé.