Stjörnumenn stungu af í seinni hálfleik - fyrstir í undanúrslitin

Stjörnumenn eru komnir í undanúrslit Powerade-bikars karla í körfubolta eftir 17 stiga sigur á ÍR, 94-77, í Garðabænum í dag. ÍR-ingar voru tveimur stigum yfir í hálfleik, 40-38, en Stjörnumenn skiptu um gír í þeim síðari og unnu öruggan sigur.

Stjarnan vann þriðja leikhlutann 28-18 og fjórða leikhlutann 28-19 og sigur liðsins var aldrei í mikilli hættu í seinni hálfleiknum. Þeir eru því fyrsta liðið sem tryggir sér sæti í undanúrslitunum.

Jarrid Frye skoraði 20 stig fyrir Stjörnuna, Brian Mills skoraði 18 stig og Marvin Valdimarsson var með 17 stig. Justin Shouse lét sér nægja að skora átta stig en var með níu stoðsendingar.

Eric Palm var stigahæstur hjá ÍR-ingum með 26 stig en Nemanja Sovic skoraði 18 stig og Hreggviður Magnússon var með 15 stig.

Tveir leikir, Valur-Snæfell og Reynir S.-Grindavík, hófust nú klukkan fjögur en Reykjanesbæjarliðin Keflavík og Njarðvík, mætast síðan í fjórða og síðasta leik átta liða úrslitanna á þriðjudaginn kemur.