Löng bönn, risa sektir og bannaðir frá nýliðavalinu

Eftir árslanga rannsókn komst NBA að því að Clippers hefði vísvitandi farið leiðir framhjá launaþaki deildarinnar til að greiða Leonard himinhá laun.

Vegna þessa hefur félagið verið svipt valrétti í nýliðavalinu í fimm ár, frá 2029 til 2033, og auk þess verið sektað um 30 milljónir bandaríkjadala.

Eigandinn Steve Ballmer hefur verið dæmdur í ársbann frá öllum afskiptum af körfubolta fyrir að aðstoða Leonard við að sækja tekjur utan körfuboltavallarins, og greiða honum því laun með öðrum hætti en í gegnum félagið.

Rekstrarstjórinn Gillian Zucker var dæmdur í launalaust árs bann og yfirmaður körfuboltamála hjá liðinu, Lawrence Frank, í samskonar bann í hálft ár.

Hinn 35 ára gamli Leonard hefur verið leikmaður Clippers frá árinu 2019. Hann fær ekki leikbann vegna málsins en var dæmdur til að greiða 700 þúsund dala sekt.

Frændi Leonards og umboðsmaður hans, Dennis Robertson hefur þá verið dæmdur í fimm ára bann frá því að vinna með leikmönnum eða liðum í NBA-deildinni.

Clippers komst ekki í úrslitakeppninna á síðustu leiktíð og hafði síðustu þrjú ár fyrir það fallið út í fyrstu umferð úrslitakeppninnar.