Valur áfram í Lengjubikarnum

Valur gulltryggði sæti sitt í fjórðungsúrslitum Lengjubikarsins með 2-0 sigri á KA í kvöld. Þá gerðu Leiknir og Þór 2-2 jafntefli.

Valur er nú með fimmtán stig í 2. riðli keppninnar og er einu stigi á eftir Breiðabliki, auk þess að eiga leik til góða. Kolbeinn Kárason og Stefán Guðlaugsson skoruðu mörk Vals í kvöld.

Víkingur R. og Selfoss eiga enn möguleika á að komast áfram úr 2. riðli en þrír leikir fara fram á föstudagskvöldið.

Leiknir og Þór eru bæði úr leik en liðin mættust í 3. riðli keppninar í kvöld. Þór er í þriðja sæti riðilsins með ellefu stig en Leiknir í sjötta sæti með sjö stig.

Víkingur Ó., FH og Fylkir eru örugg áfram úr 1. riðli og þá voru KR og Stjarnan búin að tryggja sig áfram úr 3. riðli.