Deila Tiger og Garcia er heimskuleg

Golfgoðsögnin Jack Nicklaus er ekki hrifinn af deilu Tiger Woods og Sergio Garcia sem mikið hefur verið fjallað um í fjölmiðlum síðustu vikur.

"Í gamla daga reyndum við allt til þess að fá blaðamenn til þess að skrifa um okkur. Í dag þurfa menn að finna leiðir til þess að komast undan umfjöllun," sagði hinn reyndi Nicklaus sem hefur lifað tímana tvenna.

"Þetta mál með Tiger og Sergio er heimskulegt. Ef þeir eru eitthvað ósáttir þá hljóta þeir að leysa það sín á milli. Þið blaðamenn viljið ganga frá öllu í blöðunum. Það þarf enginn á því að halda. Þeir munu leggja þetta mál til hliðar og halda áfram."

Málið varð fyrst ljótt er Garcia sagðist vilja bjóða Tiger í mat þar sem hann ætlaði að vera með djúpsteiktan kjúkling.

Hann hefur síðar beðist afsökunar á þeim ummælum.