Íbúar á Stokkseyri skelkaðir

Íbúar á Stokkseyri eru skelkaðir eftir að manni var haldið nauðugum í húsi bænum þar sem hann var pyntaður af ofbeldismönnum í sólarhring. „Sárgrætilegt og hræðilegur atburður", segir  eigandi Shell skálans, þar sem maðurinn kom  illa særður inn.

Á Stokkseyri búa um 500 manns en þorpið tilheyrir Sveitarfélaginu Árborg. Eins og kunnugt er þá var manni haldið þar nauðugum í húsi í byrjun vikunnar og hann píndur og pyndaður af þekktum ofbeldismönnum. Fórnarlambið komst inn í Shell skálann á Stokkseyri þar sem hann gat gert vart við sig. Jón Jónsson er eigandi skálans. Hann segir að íbúar á Stokkseyri séu í sjokki eftir atburðinn.

„Auðvitað er fólk hrætt og skelklað eftir svona atburði. Þessi ungi maður flutti hingað í þetta hús og hann þekkti greinilega einhverja óvandaða einstaklinga í Reykjavík. Þessir menn ákveða svo að heimsækja hann til að framkvæma þarna einhvern verknað sem við skiljum ekki og hreinlega kunnum ekki skil á.“

Jón segir mjög slæmt að Stokkseyri skuli fá alla þessa athygli vegna málsins. Bæjarbúar viti ekki meira um málið en það sem fram hefur komið í fjölmiðlum. Þá var Jón ekki á staðnum þegar fórnarlambið kom inn í Shell- skálann.

„Nei, ég var ekki á staðnum og veit ekki neitt um neitt. Ég verð bara að segja að er sorglegt í alla staði og alveg sárgrætilegt ef satt reynist. Það er alveg hræðilegt að þetta skuli gerast bara á Íslandi, þessu litla friðsæla landi.“

Fimm menn sitja nú í gæsluvarðhaldi vegna málsins.