Sigurður Ragnar bíður svars í næstu viku

Sigurður Ragnar Eyjólfsson er kominn aftur til landsins eftir viðtal hjá Knattspyrnusambandi Englands í gær.

Sigurður Ragnar er einn þeirra sem sækjast eftir starfi þjálfara enska kvennalandsliðsins. Hann segist ekki eiga von á svari fyrr en í næstu viku en þá kæmi í ljós hvort hann kæmist í framhaldsviðtal eða ekki.

Landsliðsþjálfarinn fyrrverandi segir viðtalið hafa tekið um klukkustund en hafði lítið annað um málið að segja.

Sigurður Ragnar hefur verið sterklega orðaður við starf þjálfara karlaliðs Fram í knattspyrnu. Framarar hafa einnig rætt málin við Þorlák Árnason sem þjálfaði Íslandsmeistara Stjörnunnar í kvennaflokki síðustu þrjú ár.