Walker þurfti 188 mót til að vinna

Jimmy Walker sigraði á Frys.com Open mótinu sem lauk í gær á PGA-mótaröðinni í Kaliforníu. Walker tókst loksins að sigra en mótið var hans 188. á mótaröðinni og aldrei hafði honum tekist að bera sigur úr býtum. Í gær tókst honum það loksins.

„Þetta er mjög góð tilfinning. Ég myndi ekki gera neitt öðruvísi til að komast á þennan stað sem ég stend á í dag,“ sagði Walker, 34 ára, eftir að sigurinn var í höfn. Hann lék lokahringinn á 66 höggum og lék samtals á 17 höggum undir pari í mótinu. Vijay Signh varð annar á 15 höggum undir pari.

Fjórir kylfingar deildu þriðja sætinu á 14 höggum undir pari en það voru þeir Brooks Koepka, sem var efstur fyrir lokahringinn, Hideki Matsuyama, Kevin Na og Scott Brown.