Vala Matt: Skötuselur með beikoni

Sjöundi þáttur Sælkeraferðarinnar með Völu Matt var á dagskrá Stöðvar 2 í gær. Þar heimsótti Vala Drangsnes og lærði að steikja skötusel vafinn í beikon og með rjómasósu.

„Hann tók þrjár mínútur að elda og var geggjaður með glænýjum kartöflum. Hvert sem ég fer í þáttunum er lygilegt að fá spriklandi fisk upp á diskinn og finna hjarta landsins slá í gegnum fiskinn, lambið og lífrænt ræktaða grænmetið, sem er engu öðru líkt,“ segir Vala.

Skötuselur með beikoni

Aðferð:

Skerið skötuselinn í lengjur, um það bil 2 sentimetra breiðar og 10 sentimetra langar. 

Hver lengja af skötusel er síðan vafin inn í eina þunna sneið af beikoni. Örlítil olía er sett á pönnuna og bitarnir steiktir í aðeins tvær til þrjár mínútur eða þangað til beikonið er aðeins orðið brúnað og snúið við á meðan þannig að þær steikist jafnt. 

Að lokum er rjóma hellt yfir fiskbitana og pannan hrist örlítið til þess að rjómasósan fái bragð frá fiskinum og beikonsneiðunum. Borið fram með nýjum kartöflum og salati ef vill. 

Sigin grásleppa

Grásleppan er skorin í parta eða klippt. 

Sett í sjóðandi vatn og soðin í 5 mínútur. 

Borin fram með karföflum og smjöri.