Vatn flæddi yfir rauða dregilinn á Golden Globe

Bilun í brunaúðarakerfi á Beverly Hilton hótelinu hefur sett strik í reikninginn fyrir Golden Globe verðlaunahátíðina sem haldin er í kvöld.

Vatn flæddi yfir þriðjung rauða dregilinn fræga þar sem ljósmyndarar taka myndir af helstu kvikmyndastjörnum heims.

Netmiðillinn ET segir frá því að vatn hafi lekið niður af svölunum á hótelinu en mikið gekk á þegar hreinsunarteymi reyndi að takmarka skaðann sem hlaust af lekanum.

Í yfirlýsingu frá Beverly Hilton hótelinu og forsvarsmönnum hátíðarinnar segir að þetta muni ekki hafa áhrif á hátíðina og að rauði dregillinn muni opna á tilsettum tíma.

Hægt er að horfa á beina útsendingu frá Golden Globe hátíðinni á Stöð 3 en útsending hefst klukkan 01:00 í nótt.