Honda Classic hefst á morgun

Eitt vinsælasta mót ársins á PGA mótaröðinni hefst á morgun en Honda Classic mótið fer fram á PGA National vellinum í Flóridaríki.

Það er óhætt að fullyrða að það sé töluverð eftirvænting meðal golfáhugamanna um allan heim fyrir mótinu enda er þátttakendalistinn svipaður og um sé risamót að ræða.

Allir efstu menn heimslistans munu taka þátt að þessu sinni, þar á meðal Tiger Woods sem þarf að gera gott mót um helgina en keppnistímabil hans hefur farið mjög illa af stað og mætir hann eflaust ákveðinn til leiks.

PGA National völlurinn er talinn vera einn erfiðasti golfvöllur í Bandaríkjunum en hann er par 70, yfir 80 glompur eru á honum og rúmlega 30 vatnstorfærur.

Hann mun því reynast bestu kylfingum heims erfið prófraun en í fyrra vann Michael Thompson eftir að hafa leikið hringina fjóra á níu höggum undir pari.

Honda classic mótið verður að sjálfsögðu sýnt í beinni útsendingu á Golfstöðinni en bein útsending hefst á morgun klukkan 19.00.