McIlroy og Stenson úr leik á heimsmótinu í holukeppni

Öðrum keppnisdegi á heimsmótinu í holukeppni var að ljúka rétt í þessu en 32 manna úrslit voru spiluð út í dag á Dove Mountain vellinum í Arizona. Hæst ber að nefna að tvö stærstu nöfnin í mótinu duttu út í dag en bæði Rory McIlroy og Henrik Stenson töpuðu sínum leikjum gegn Harry English og Louis Oosthuizen.

Margar áhugaverðar viðureignir einnig fóru fram eins og alltaf þegar að þetta skemmtilega mót fer fram en Sergio Garcia var fyrsti kylfingur dagsins til þess að tryggja sig áfram í 16 manna úrslit með því að leggja fyrrum FedEx meistarann Bill Haas 3/1. Garcia býður þó erfitt verkefni fyrir höndum í næstu umferð en hann leikur við ungstirnið Rickie Fowler sem sigraði einn besta kylfing PGA mótaraðarinnar á þessu ári, Jimmy Walker, í leik sem endaði ekki fyrr en á 18. holu.  Eitt er víst að augu margra golfáhugamanna eiga eftir að vera á leik Garcia og Fowler á morgunn en báðir kylfingar spila sókndjarft og skemmtilegt golf.

Spieth til alls líklegur

Einn efnilegasti kylfingur heims, Jordan Spieth, hafði sigur gegn reynsluboltanum Thomas Björn og virðist vera til alls líklegur á næstu dögum. Spieth er aðeins 20 ára gamall en hefur vakið verðskuldaða athygli á PGA mótaröðinni undanfarið ár fyrir frammistöðu sína. Hann virkaði bjartsýnn á framhaldið í mótinu í viðtali við Golf Channel eftir sigurinn í dag.

„Ég átti mjög þægilegan dag, var nokkra undir á meðan að Thomas var ekki alveg að sýna sitt besta golf. Ég hef töluverða reynslu af holukeppnisfyrirkomulaginu síðan að ég spilaði í háskólagolfinu og hún er að hjálpa mér, núna er málið bara að einbeita sér að næsta leik, hann verður örugglega skemmtilegur.“



Þá voru einnig mörg önnur stór nöfn sem komust áfram í dag, Bubba Watson sigraði Svíann Jonas Blixt 2/0, sigurvegari síðasta árs, Matt Kuchar, sigraði Ryan More í spennandi leik 1/0 ásamt því að Webb Simpson sigraði góðan félaga sinn, Brandt Snedeker örugglega 4/3. Graeme McDowell fór einnig áfram í næstu umferð eftir að honum tókst að snúa nánast töpuðum leik sér í vil á lokaholunum gegn japanska kylfingnum Hideki Matsuyama en hann slapp einnig með skrekkinn í fyrstu umferðinni gegn Gary Woodland. Í síðasta leik dagsins áttust Justin Rose og Ernie Els við í mögnuðum leik sem kláraðist ekki fyrr en á 20 holu eftir að Els hafði fengið tvo fugla í röð.

Mótið er að sjálfsögðu sýnt á Golfstöðinni og hefst útsending frá þriðja degi á morgun klukkan 19:00.



Í 16 manna úrslitum mætast:

Í Bobby Jones riðlinum:

Webb Simpson og Louis Oosthuizen

George Coetzee og Jason Day

Í Ben Hogan riðlinum:

Jim Furyk og Harry English

Sergio Garcia og Rickie Fowler

Í Sam Snead riðlinum:

Graeme McDowell og Hunter Mahan

Bubba Watson og Victor Dubuisson

Í Gary Player riðlinum:

Matt Kuchar og Jordan Spieth

Jason Dufner og Ernie Els