McIlroy ætlar að bæta fyrir mistökin um síðustu helgi

Rory McIlroy er staðráðinn í því að koma sterkur til baka eftir vonbrigði síðustu viku en Norður-Írinn ungi glataði niður þriggja högga forystu á Honda Classic á lokahringnum og tapaði að lokum í bráðabana. Í dag hefst annað mótið á heimsmótaröðinni í golfi, Cadillac meistaramótið, en McIlroy segist mjög ánægður með leik sinn þessa dagana.

„Það var erfitt að sætta sig við að spila svona illa á lokaholunum í síðustu viku eftir að hafa verið í frábærri stöðu. Í golfheiminum þarf maður að læra að horfa fram á veginn og það er það sem ég ætla að gera, ég er virkilega ánægður með leik minn þessa dagana og mér finnst eins og ég geti verið í toppbaráttunni um helgina ef ég held rétt á spilunum.“

Annað mótið á Heimsmótaröðinni í golfi fer fram á Doral vellinum í Miami en hann er oft kallaður „Bláa skrímslið“ vegna þess hve erfiður hann er. Allir bestu kylfingar heims mæta til leiks og því sannkölluð veisla framundan á Golfstöðinni sem mun sýna mótið í beinni en útending hefst klukkan 18:00 í dag.