Fjarvera Ronaldos kom ekki að sök

Real Madrid hélt lífi í titilvonum sínum með öruggum 4-0 sigri á Real Sociedad á útivelli í spænsku úrvalsdeildinni í kvöld.

Cristiano Ronaldo lék ekki með Real Madrid í kvöld, en það kom ekki að sök. Asier Illarramendi skoraði fyrsta mark leiksins á lokamínútu fyrri hálfleiks og í seinni hálfleik bættu þeir Gareth Bale, Pepe og varamaðurinn Alvaro Morata við mörkum.

Real Madrid situr nú í þriðja sæti spænsku úrvalsdeildarinnar með 76 stig, tveimur stigum á eftir Barcelona og þremur á eftir toppliði Atletico Madrid, en bæði liðin unnu leiki sína fyrr í dag. Sex umferðum er ólokið í deildinni.

Real Sociedad féll með tapinu niður í sjötta sæti deildarinnar, en liðið er nú sex stigum frá Meistaradeildarsæti.