Lydia Ko sigraði á Swinging Skirts

Hin 17 ára gamla Lydia Ko frá Nýja-Sjálandi tryggði sér dramatískan sigur á Swinging Skirts meistaramótinu sem kláraðist í gær. Mótið fór fram á Lake Merced vellinum í Kaliforníu en Ko tryggði sér sigurinn með því að fá glæsilegan fugl á lokaholunni.

Ko hefur tvisvar áður sigrað á LPGA móti en sigurinn í gær er hennar fyrsti sem atvinnukylfingur. Hún endaði mótið á samtals 12 höggum undir pari en hin vinsæla Stacy Lewis frá Bandaríkjunum var önnur á 11 höggum undir. Fyrir sigurinn fékk Ko rúmlega 35 milljónir króna sem verður að teljast fín afmælisgjöf en hún fagnaði 17 ára afmæli sínu í vikunni.

Jenny Shin frá Suður-Kóreu endaði í þriðja sæti en hún lék hringina fjóra á 10 höggum undir pari. Efsti kylfingur á heimslista kvenna, Inbee Park, deildi fjórða sætinu með Shanshan Feng og Line Vedel á sex höggum undir pari.