Flores og Cabrera jafnir í efsta sæti á Wells Fargo

Martin Flores og Angel Cabrera deila forystusætinu á Wells Fargo meistaramótinu sem fram fer á Quail Hollow vellinum í Norður-Karólínu þegar að mótið er hálfnað. Eftir tvo hringi eru þeir báðir á níu höggum undir pari en í þriðja sæti á átta höggum undir pari er US Open meistarinn Justin Rose. Bandaríkjamennirnir J.B. Holmes og Shawn Stefani koma næstir og eru jafnir í fjórða sæti á sjö höggum undir pari.

Tvö stærstu nöfnin í mótinu, Phil Michelson og Rory McIlroy áttu alls ekki góðu gengi að fagna á öðrum hring eftir að hafa byrjað mótið vel. Mickelson lék fyrsta hring á fimm höggum undir pari en kom inn á 75 höggum á þeim öðrum, þremur höggum yfir pari og er jafn í 30. sæti á tveimur höggum undir pari. McIlroy lék á 76 höggum í gær og rétt komst í gegn um niðurskurðinn en hann fékk meðal annars tvo tvöfalda skolla í röð á þriðju og fjórðu holu.

Þriðji hringur verður í beinni útsendingu á Golfstöðinni frá klukkan 17:00 í kvöld