Oddvitaáskorunin - Þýðir ekkert að sitja heima og kvarta

Vísir stendur fyrir Oddvitaáskoruninni 2014 þar sem skorað er á oddvita allra flokka í kjördæmum um land allt að taka þátt.

Óttar Bragi Þráinsson leiðir Þ-listann í Bláskógabyggð í sveitarstjórnarkosningunum í vor.

Óttar Bragi kemur úr Miklaholti í Biskupstungum. Hann stundaði allt sitt skyldunám við grunnskólann í Reykholti. Fyrst í gamla skólanum sem nú hýsir leikskólann Álfaborg og síðar í nýja grunnskólanum. Að loknu grunnskólaprófi lá leiðin í Fjölbrautaskóla Suðurlands á Selfossi. Eftir nokkurra anna nám við Fjölbrautaskóla Suðurlands ákvað Óttar Bragi að fylgja hjartanu og skella sér í Bændaskólann að Hvanneyri. Að loknu búfræðinámi kom hann að búi með foreldrum sínum en stundaði girðingaverktöku á sumrin meðfram bústörfunum.

Í dag er Óttar Bragi kúabóndi í Miklaholti í samstarfi við foreldra sína og sambýliskonu sína, Line L. Christiansen. Þau Line eiga saman einn son á grunnskólaaldri en Óttar Bragi átti tvö börn fyrir frá fyrra sambandi.

Ég hef löngum verið virkur í félagsmálum og samfélagsmálum í heild sinni. Það má eiginlega segja að öll mín áhugamál snúi annaðhvort að bústörfum eða að félagsmálum. Ég er á því að það þýði ekkert fyrir mig að sitja heima og kvarta yfir hlutunum, ég þarf að fara út og gera eitthvað í málunum. Þess vegna hefur virkað vel fyrir mig að skella mér í félagsstörfin og hafa áhrif.

Við búum í fjölbreyttu og góðu samfélagi, en fjölbreytt samfélag getur orðið fjölbreyttara og gott samfélag getur orðið enn betra og þar tel ég mig geta lagt mitt af mörkum. Nú tel ég hins vegar tímabært að stíga skrefið til fulls og hafa áhrif með hagsmuni allra íbúa sveitarfélagsins að leiðarljósi.

Þess vegna býð ég mig nú fram sem oddvitaefni Þ-listans í Bláskógabyggð.

YFIRHEYRSLAN

Hver er fallegasti staðurinn á Íslandi?

Allar náttúruperlur bláskógabyggðar.

Hundar eða kettir?

Það er bara einn besti vinur mannsins.

Hver er stærsta stundin í lífinu?

Fæðing barnanna minna.

Hver er uppáhaldsmaturinn þinn?

Heimaalið lamb eða naut.

Hvernig bíl ekur þú?

Dodge Ram, það er samt eiginlega dráttavél, svo fæ ég stundum bílinn hjá konunni, það er Hundai jepplingur.

Besta minningin?

Allar tengdar fjölskyldunni, þegar við gerum eitthvað saman hlæjum og höfum það gott.

Hefur þú verið tekinn af lögreglunni?

Nei en ég hef verið stöðvaður af henni þegar ég keyrði of hratt við Ingólfsfjall á hraðferð með konuna á fæðingardeildina.

Hverju sérðu mest eftir?

Hárinu.

Draumaferðalagið?

Þessa stundina er það Róm. Og kannski Grænland.

Hefur þú migið í saltan sjó?

Já, já, en það var fyrir allar reglugerðir og rotþrær þannig að það brot er fyrnt.

Hvað er það skrýtnasta sem þú hefur gert?

Ég áði í skála uppi á hálendi vegna girðingavinnu á sama tíma og upptaka stefnumótaþáttarins Djúpa laugin fór þar fram. Stöðvaði alla hugsanlega rómantík sem átti að eiga sér stað.

Hefur þú viðurkennt mistök?

já.

Hverju ertu stoltastur af?

Fjölskyldunni, börnunum og búskapnum. Þetta persónulega, en svo er ég náttúrulega að rifna af stolti yfir þessu framboði og fólkinu sem er á þessum lista. Like á það.

Fram að sveitarstjórnarkosningunum 31. maí munum við birta kynningu á oddvitum víðsvegar um landið. Allir oddvitar geta tekið þátt í Oddvitaáskorun Vísis. Nánari upplýsingar er hægt að nálgast á netfanginu samuel@365.is.