McIlroy byrjar illa á Opna írska

Það er ávalt mikil spenna hjá írskum golfáhugamönnum þegar að Rory McIlroy tekur sér frí frá PGA-mótaröðinni í Bandaríkjunum og heldur til Írlands til þess að taka þátt í Opna írska meistaramótinu.

Mótið hófst í morgun en McIlroy olli miklum vonbrigðum og er eftir fyrsta hring jafn í 125. sæti af 156 kylfingum eftir að hafa leikið Fota Island völlinn á 74 höggum eða þremur yfir pari.

Hann þarf því að eiga góðan hring á morgun til þess að komast í gegn um niðurskurðinn sem miðast við 70 efstu kylfingana í mótinu að tveimur hringjum loknum.

Fleiri stór nöfn eru með á mótinu sem spila yfirleitt á bandarísku PGA-mótaröðinni og markar Opna írska meistaramótið undirbúning margra þeirra fyrir Opna breska meistaramótið sem fram fer í júlí.

Þar má helst nefna Norður-Írann Graeme McDowell sem lék á 68 höggum eða þremur undir pari, Padraig Harrington sem lék á 69 höggum eða tveimur höggum undir pari og Darren Clarke sem lék fyrsta hring á 72 höggum eða einu yfir.

Finnski kylfingurinn Mikko Ilonen leiðir mótið með tveimur höggum en hann lék á 64 höggum í dag eða á sjö undir pari.