Martin Kaymer sigraði á US Open með yfirburðum

Þjóðverjinn Martin Kaymer sigraði í nú í kvöld á Opna bandaríska meistaramótinu en þetta er í annað sinn sem þessi 29 ára kylfingur sigrar á risamóti í golfi.

Kaymer hefur verið í sérflokki alla helgina á hinum erfiða Pinehurst velli nr.2 en fyrir lokahringinn var hann á átta höggum undir pari, fimm höggum á undan þeim Erik Compton og Rickie Fowler sem deildu öðru sætinu á þremur höggum undir.

Stóra spurningin var þó hvort að pressan næði til Kaymer á lokahringnum en hann svaraði henni með frábærri frammistöðu sem minnti á Tiger Woods er hann var upp á sitt besta, yfirburðirnir voru slíkir.

Kaymer lék lokahringinn á 69 höggum eða einu höggi undir pari og endaði því mótið á níu höggum höggum undir pari. Hann sigraði mótið að lokum með átta högga mun en þeir Compton og Fowler deildu öðru sætinu á einu höggi undir pari eftir að hafa báðir leikið lokahringinn á 72 höggum.

Nokkrir kylfingar enduðu jafnir í fjórða sæti samtals á einu höggi yfir pari en það voru þeir Dustin Johnson, Henrik Stenson, Jason Day, Brooks Koepka og Keegan Bradley. Sigurvegari síðasta árs, Justin Rose, átti ágæta titilvörn en hann endaði jafn í 12.sæti á þremur höggum yfir pari.