Var hluti af sigursælasta liði í heimi

„Að spila yfir 100 leiki fyrir Barcelona er eitthvað sem maður er stoltur af. Maður áttar sig ekki á því fyrr en eftir á. Þó að ég hafi ekki verið mikilvægasti maður liðsins var ég hluti af sigursælasta liði heims.“ segir Eiður Smári Guðjohnsen í viðtali við Viðskiptablaðið í dag.

Eiður er í ítarlegu viðtali í Viðskiptablaðinu þar sem farið er yfir víðan völl. Eiður ræðir þar ferilinn ásamt því að tala um mistökin sem hann gerði þegar hann skrifaði undir hjá Stoke.

Þegar tíma Eiðs lauk hjá Barcelona gekk hann til liðs við Monaco. Dvöl hans þar gekk illa og fór hann á láni til Tottenham eftir aðeins hálft ár en hann var í viðræðum við Tottenham áður en hann gekk til liðs við Monaco.

„Mér fannst á þeim tíma ég hafa lokið tíma mínum í Englandi, ég hafði skapað mér nafn og unnið titla með öðru liði og mér fannst erfitt að fara í nýtt lið,“ en Mónakó bauð upp á eitthvað nýtt að mati Eiðs.

„Ég valdi frekar að fara til Mónakó sem var spennandi verkefni að mörgu leyti. Það var sjarmi yfir valinu, fallegur staður og allt annað en maður hafði prófað en ég átti erfitt með að aðlagast lífinu þar,“ sagði Eiður.

Mestu mistök Eiðs á ferlinum að eigin mati voru félagsskiptin frá Mónakó til Stoke.

„Stoke var eitt af fáum liðum sem hafði áhuga sem var tilbúið að borga svipuð laun áfram. Ég ákvað að slá til en það voru mín mestu mistök, ég spilaði lítið og átti í stirðu sambandi við þjálfarann,“ sagði Eiður við Viðskiptablaðið.