Ebóla berst til Nígeríu

Stjórnvöld í Nígeríu hafa staðfest að líberskur maður hefði látist úr Ebóluveiru þar í landi. Maðurinn hneig niður á flugvelli í Nígeríu og var hann fluttur með hasti í sóttkví þar sem hann lést.

Ebólunnar var fyrst vart í Gíneu í ársbyrjun og hefur hún síðan þá náð að breiðast út til nærliggjandi landa, Líberíu og Sierra Leone og óttast er að hann hafi nú borist til Nígeríu, fjölmennasta ríkis Afríku. Onyebuchi Chukwu, heilbrigðisráðherra Nígeríu segir þó ólíklegt að fleiri hafi smitast.

Faraldurinn hefur dregið 660 manns til dauða og er sagður sá allra versti og skæðasti í sögunni. Allra leiða er því leitað til að hefta útbreiðslu hans.

Ebóla-vírusinn smitast milli manna meðal annars í jarðarförum þeirra sem hafa látist af hans völdum. Rúmlega helmingur þeirra sem smitast af ebóla-vírusnum deyr. Engin lækning er til við vírusnum sem  veldur innvortis blæðingum og líffærabilun.