Kylfingur segir Golfsambandið gjaldþrota

Margeir Vilhjálmsson birtir í dag á vefnum Kylfingur.is harðorðan pistil þar sem hann fjallar um ástandið hjá Golfsambandi Íslands í sumar en í gær bárust þess fregnir að Ísland myndi ekki senda karlalið á heimsmeistaramót áhugamanna í ár.

Mótið fer fram í Kína í ár en Úlfar Jónsson sagði í samtali við Kylfing í gær að fjárskortur væri ástæðan fyrir því að Ísland myndi ekki senda karlalið á mótið.

Margeir var áður fyrr framkvæmdarstjóri Golfklúbbs Reykjavíkur og bauð sig fram í stöðu forseta Golfsambands Íslands og boðaði töluverðar breytingar yrði hann kosinn í stöðuna, meðal annars að auka stuðning við þátttöku afreksfólks erlendis.

Margeir gerir lítið úr þessum skýringum og bendir á að þrátt fyrir að kvennaliðið hafi keppt á mótinu í ár væri stuðningur GSÍ ekki nægilegur en brot úr pistli hans má sjá hér fyrir neðan.

„Ég hef ítrekað á undanförnum árum komið á framfæri áhyggjum mínum af því hvert golfíþróttin sé að stefna hér á landi. Í viðleitni minni til að berjast gegn stefnunni bauð ég mig fram til embættis forseta GSÍ en þurfti að lúta í lægra haldi gegn sitjandi forystumönnum. Loforðaflaumurinn á síðasta Golfþingi um bót, betrun og nýja stefnu til framtíðar hlaut hljómgrunn meðal þingfulltrúa en þegar hingað er komið er betrumbótin enn ekki komin af undirbúningsstigi.“

Segir Margeir meðal annars áður en hann fjallaði um afreksstefnu GSÍ

„Steininn tók úr þegar fréttir bárust af því að GSÍ eigi ekki peninga til að senda þriggja manna karlalið til þátttöku á HM í golfi í Japan.  Kvennalið var sent en eingöngu vegna þess að landsliðsþjálfarinn sem á eftirminnilegan hátt sagði upp í vetur en hætti svo við og byrjaði aftur fann ekki 6 stúlkur sem voru nógu frambærilegar til þess að senda á EM í sumar.“

„Einhvern veginn er ég viss um það að ef hinn almenni kylfingur hefði fengið að vita af fjárnauð GSÍ þá hefðu góðir menn sett upp 1-2 styrktarmót og safnað fyrir för karlaliðsins til Japan.Þrotið er ekki bara fjárhagslegt, heldur líka hugmyndafræðilegt,“ skrifaði Margeir á Kylfingur.is en allan pistil Margeirs má sjá hér.