Game of Thrones-dvergurinn leikur illmennið

X-Men: Days of Future Past var frumsýnd í gær en hún fjallar um X-Men-hetjurnar eins og fyrri myndirnar. Nú eru þær í vanda staddar því í myrkum hliðarheimi ganga ill vélmenni Bolivers Trask um og veiða og myrða stökkbreytta. Prófessor X og Magneto bregða því á það ráð að senda Wolverine aftur í tímann til að breyta sögulegum viðburði sem gæti haft áhrif á alla, jafnt mannfólk sem stökkbreytta.

Það er dvergurinn Peter Dinklage sem fer með hlutverk Bolivers Trask en hann er hvað þekktastur fyrir túlkun sína á Tyrion Lannister í sjónvarpsþáttunum Game of Thrones. Leikstjóri myndarinnar, Bryan Singer, segir karakter Bolivers vera byggðan á þýska nasistaforingjanum Adolf Hitler.

„Hitler notaði gyðingana sem blóraböggla til að tengja saman myrka hluta Evrópu og Boliver gerir það sama með þá stökkbreyttu. En hann var ekki 180 sentímetra hár, fullkominn, ljóshærður aríi – hann var stuttur og skringilega útlítandi maður!“ segir Singer. Hann segist hafa talað við James Cameron í tvo tíma, leikstjóra myndanna The Terminator og Terminator 2: Judgement Day, um hvernig ætti að láta tímaferðalag virka í myndinni. Töluðu þeir meðal annars um hliðarheima og strengjakenninguna.

Hugh Jackman leikur Wolverine í þessari mynd og er þetta í sjöunda sinn sem hann leikur karakterinn í kvikmyndinni. Þar bætir hann sitt eigið met í að leika oftast karakter úr teiknimyndasögu í bíómynd. Hann er einnig eini leikarinn sem leikur í öllum X-Men-myndunum.

Í öðrum hlutverkum í myndinni eru Jennifer Lawrence, Michael Fassbender, Ian McKellen, Ellen Page, James McAvoy og Halle Berry.