Bubba bar sigur úr býtum á Travelers

Bubba Watson sigraði á Travelers meistaramótinu sem kláraðist í kvöld en þetta er annað mótið á tímabilinu sem hann sigrar á.

Hann lék hringina fjóra á TPC River Highlands vellinum á 16 höggum undir pari, sama skori og Englendingurinn Paul Casey og því þurfti að grípa til bráðabana.

Þar hafði Watson betur eftir frábæran fugl á annarri holu en þetta er áttunda mótið á PGA-mótaröðinni sem hann sigrar í á ferlinum.

Watson átti sigurinn svo sannarlega skilið en hann leiddi mótið nánast frá byrjun og virðist vera að komast í sitt besta form fyrir Opna breska meistaramótið í næsta mánuði.

Fyrir sigurinn fær hann rúmlega 130 milljónir króna í verðlaunafé en Casey, sem hefur nú tapað í tveimur bráðabönum á árinu, verður að sætta sig við 90 milljónir.