Tæpur milljarður í reddingar í ferðamannaþjónustu

Tæplega milljarður króna sem fer til brýnnar uppbyggingar og verndunar ferðamannastaða í sumar dugar skammt að mati fulltrúa Vinstri græanna í atvinnuveganefnd. Ráðist verður í rúmlega hundrað verkefni á fimmtíu og einum stað á landinu.

Meðal þess sem stendur til að bæta er salernisaðstaða ferðamanna. Til dæmis við Silfru á Þingvöllum en þar varð fréttnæm fyrir stuttu síðan slæleg umgengni ferðamanna og víða annars staðar um landið.

Öryggi ferðamanna er víða hætt komið. Unnið verður í öryggismálum við Gullfoss og gerðir nýir göngustígar og útsýnispallur, auk þess sem verður hönnuð öryggisgirðing vegna grjóthruns að fossinum.

Mest verður framkvæmt í Skaftafelli og á Þingvöllum, við Geysi, í Dimmuborgum, á miðhálendinu, við Gullfoss, Dyrhólaey, Dynjanda, Stöng í Þjórsárdal og Dettifoss. Verkefnin eru af ýmsum toga en megináhersla er lögð á grunnvinnu, svo sem göngustíga, bílastæði og salernisaðstöðu.

Fyrirliggjandi framkvæmdaáætlun fyrir þetta ár var unnin í samstarfi forsætisráðherra, iðnaðar- og viðskiptaráðherra og umhverfis- og auðlindaráðherra. Kallað var eftir tillögum þeirra stofnana sem hafa umsjón með umræddum svæðum og í kjölfarið var verkefnum forgangsraðað í samræmi við faglegt mat á því hver brýnasta þörfin væri. Fjármagnið rann Framkvæmdasjóðs ferðamannastaða sem mun annast umsýslu og eftirlit með verkefnaáætluninni.

Lilja Rafney Magnúsdóttir varaformaður atvinnuveganefndar og þingmaður Vinstri Grænna gagnrýnir hægagang ríkisstjórnarinnar og segir aðgerðirnar duga skammt.



„Ég er því miður hrædd um að þetta sé svona bráðabirgðaredding, kannski eins og að pissa í skóinn sinn og ekkert víst að þetta dugi. Það vantar algjörlega stefnumótum í þennan málaflokk. Hún hefur ekki verið til frá því að þessi ríkisstjórn tók við. Og tók þá ákvörðun að fjármagna ekki Framkvæmdasjóð ferðamannastaða eins og áætlanir voru uppi um.

Nú stöndum við frammi fyrir þessum mikla vandræðagangi að reyna að bjarga málum utan fjárlaga og við verðum auðvitað að gera þetta með markvissum hætti ef að við ætlum að taka á móti þessum gífurlega ferðamannafjölda sem blasir við þá verða innviðirnir að vera í lagi.“

Ferðamannafjöldi hefur margfaldast á árinu. 517 þúsund ferðamenn komu til landsins á fyrstu sex mánuðum ársins. Um er að ræða 28,7% aukningu milli ára. Veruleg aukning hefur verið frá flestum mörkuðum; mest er hún frá Bandaríkjunum eða um 40,3% aukning og því næst frá Bretlandi eða um 28,1%.

Árið 2018 er því spáð að tvær milljónir ferðamanna sæki landið heim og löngu orðið ljóst að uppbygging innviða ferðaþjónustunnar er orðin mjög brýn.