Jóhann Helgi heldur vonum Þórsara um Pepsi-deildina á lífi

Þór heldur Pepsi-deildar vonum sínum á lífi fyrir síðustu tvær umferðirnar í fyrstu deild karla með 2-1 sigri á Grindavík í dag.

Sveinn Elías Jónsson kom Þór yfir á 54. mínútu, en Alejandro Jesus Blzquez Hernandez jafnaði metin á síðustu mínútu venjulegs leiktíma.

Jóhann Helgi Hannesson sætti sig ekki við jafntefli og skoraði sigurmarkið með nánast lokaspyrnu leiksins. Lokatölur 2-1 sigur Þórsara.

Þór heldur sér því á lífi í toppbaráttunni. Þór er í fjórða sæti með 35 stig, en Þróttur er í því þriðja með 37 og KA í öðru með 38.

Þróttur á leik til góða, en Grindavík er í sjöunda sætinu með 30 stig.