Filippseyingar gáfu ágóðann af sölu vorrúlla

Filippseyingar í samtökunum Project Pearl Iceland gáfu ágóðann af vorrúllum og öðrum kræsingum sem þeir elduðu og seldu í Ráðhúsi Reykjavíkur á fjölmenningardeginum fyrir viku, alls 140.342 krónur, í neyðarsöfnun UNICEF á Íslandi.

„Allur ágóði rann í neyðarsöfnun UNICEF á Íslandi fyrir börn í Nepal sem eiga um sárt að binda eftir jarðskjálftann mikla fyrir um þremur vikum. Framlag þeirra mun meðal annars fara í að útvega hreint vatn og hreinlætisgögn á skjálftasvæðinu í Nepal, nauðsynleg lyf, sálrænan stuðning og bóluefni til að reyna að koma í veg fyrir mislingafaraldur,“ segir Sigríður Víðis Jónsdóttir, upplýsingafulltrúi UNICEF á Íslandi.

Hún segir neyðina í Nepal gríðarlega. „Hvert einasta framlag skiptir máli. Við erum félögum í Project Pearl Iceland innilega þakklát fyrir framlag sitt og fyrir allan stuðninginn. Hann er algjörlega ómetanlegur.“

Neyðarsöfnunin stendur enn yfir en alls hafa safnast yfir 15 milljónir króna.