Fara fram á tugi milljóna króna vegna Feneyjatvíæringsins

Kynningarmiðstöð íslenskrar myndlistar hefur krafið yfirvöld í Feneyjum um bætur upp á 360 þúsund evrur, 53,4 milljónir króna, vegna lokunar á verki sem var framlag Íslands á Feneyjatvíæringnum fyrr á árinu.

Verkið, sem var eftir Christoph Büchel, var moska í húsi sem hýsti áður kaþólska kirkju frá 10. öld.

Verkið hafði verið opið í tvær vikur þegar því var lokað af yfirvöldum í lok maí.

Kynningarmiðstöðin fékk aðgang að gögnum um lokunina hjá yfirvöldum en þar kemur meðal annars fram að verkinu hafi verið lokað vegna heilbrigðis- og öryggismála en yfirvöld telja að húsið hafi ekki haft burði til að hýsa þann mannfjölda sem þar kom saman.

Þá munu yfirvöld í Feneyjum einnig hafa óttast að moskan gæti orðið skotmark öfgafullra íslamista.

Kynningarmiðstöð íslenskrar myndlistar hefur safnað vitnisburðum frá lykileinstaklingum í myndlistarheiminum til að renna stoðum undir málflutning sinn fyrir ítölskum dómstólum.

Dómstólar í Feneyjum munu taka málið fyrir á morgun og tilkynna um úrskurð þess nokkrum dögum síðar.