Þrenna frá Andreu Rán er Blikar burstuðu Selfoss

Íslandsmeistarar Breiðabliks eru enn á toppnum í A-deild Lengjubikars kvenna eftir stórsigur á Selfossi í kvöld, 7-1.

Eva Lind Elíasdóttir kom Selfossi reyndar yfir á 23. mínútu og þannig var staðan fram á 44. mínútu þegar nýjasta landsliðskonan og efnilegasti leikmaður síðasta árs, Andrea Rán Hauksdóttir, jafnaði metin.

Blikar settu svo í fluggírinn í seinni hálfleik og skoruðu sex mörk. Andrea Rán, sem spilaði sína fyrstu tvo landsleiki fyrir A-landslið Íslands á Algarve á dögunum, setti tvö í viðbót og endaði með þrennu.

Svava Rós Guðmundsdóttir skoraði tvö mörk og þær Fanndís Friðriksdóttir og Málfríður Erna Sigurðardóttir sitthvort markið.

Íslandsmeistararnir eru búnir að vinna alla þrjá leiki sína í A-deildinni og eru með níu stig, sex meira en Stjarnan og ÍBV sem eru með þrjú stig og eiga bæði leik til góða.