Stelpurnar á undan Frökkum eftir að hafa bætt metið um meira en átján sekúndur | Urðu í 11. sæti

Íslenska kvennasveitin endaði í ellefta sæti í 4 x 100 metra fjórsundi kvenna á HM í Windsor í Kanada en þetta var lokagrein íslenska hópsins á mótinu.

Stelpurnar syntu á 4:00,08 mínútum og bættu fimm ára landsmet um 18,7 sekúndur sem er rosaleg flott og mikil bæting. Gamla metið var sund upp á 4:18,78 mínútur frá því í desember 2011.

Íslenska sveitin var grátlega nálægt því að komast undir fjórar mínútur en þar munaði aðeins átta hundraðshlutum úr sekúndu.

Íslensku sveitina skipuðu þær Eygló Ósk Gústafsdóttir, Hrafnhildur Lúthersdóttir, Bryndís Rún Hansen og Jóhanna Gerða Gústafsdóttir. Til þess að komast inn í úrslitariðil hefði sveitin þurft að synda á 3:56,64 mínútum.

Íslenska sveitin var næst á eftir Svíum (10. sæti) og á undan Finnum (12. sæti). Íslensku stelpurnar voru líka á undan Frökkum (13. sæti). Ísland var 7,23 sekúndum á eftir bandarísku sveitinni sem náði besta tímanum í undanrásunum.

Bandaríkin, Japan, Ástralía, Kanada, Ítalía, Rússland, Kína og Bretland eiga sveitir í úrslitasundinu í nótt.