Fátt virðist geta komið í veg fyrir öruggan sigur Svölu

Ýmislegt bendir til þess að Svala Björgvinsdóttir muni fara með sigur í söngvakeppni sjónvarpsins og fari sem fulltrúi landsins til Kænugarðs í Úkraínu þar sem aðalkeppnin í Eurovision er haldin þetta árið.

Hjá veðmálafyrirtækinu Betsson er hægt að veðja á úrslitin. Þar eru menn ekkert að grínast; Menn kasta ekki fé sínu frá sér að gamni sínu. Ef rýnt er í þær tölur má sjá að Svala þykir langlíklegust meðal þeirra sem vilja veðja á úrslit þar.

Horfir illa fyrir Rúnari eff

Þegar lagt er af stað eru sérfræðingar sem leggja upp með tiltekinn stuðul sem svo tekur breytingum eftir því hvernig fólk vill haga veðmáli sínu. Paper með Svölu er með stuðulinn 1,9. Þetta þýðir einfaldlega það að ef þú leggur 1000 krónur undir, á Svölu og hún vinnur, þá færðu til baka 1.900 krónur. Nú, ef Svala vinnur ekki, þá er sérðu þúsund kallinn þinn ekki aftur. Og svo framvegis.

Samkvæmt Betsson eru þeir Aronar, Hannes og Brink, líklegastir til að veita Svölu keppni. Þeir eru með stuðulinn 3,5. Sá sem hins vegar telst ólíklegastur til að sigra er Rúnar Eff með lagið Make your way home enn hann er með stuðulinn 17,5, sem áður sagði, ef þú leggur þúsund krónur á að hann sigri og sú verður raunin, þá færð þú til baka 17.500 krónur til baka frá veðmálafyrirtækinu. Þannig virkar það nú.

Öll vötn falla til Dýrafjarðar

Vísir efndi til skoðanakönnunar í gær og þar er Svala með 51 prósent atkvæða. Sá sem næstur kemur er með Daði Freyr með 21 prósent atkvæða, ekki er það alveg í samræmi við stuðlana á Betsson en samkvæmt þessu virðist fátt ætla að standa í vegi fyrir öruggum sigri Svölu.

Daníel Arnarsson er háskólanemi, glöggur tölfræðingur og áhugamaður um Eurovision-söngvakeppnina. Hann hefur undanfarin ár lagt dæmið niður fyrir sig og nú reiknar hann dæmið út þannig að Svala muni hafa sigur, eins og sést á meðfylgjandi súluriti hans. Daníel tekur mið af Youtube hlustun (50%), Youtube einkunn (10%), Spotify hlustun (15%), Betsson (10%) og svo könnun Vísis (15%). Samkvæmt hans útreikningum mun fátt geta komið í veg fyrir sigur Svölu.

Bó ekki byrjaður að fagna enn

Helsti stuðningsmaður Svölu er vitaskuld faðir hennar, sem ekki væri í frásögur færandi nema vegna þess að þar fer ein helsta stjarna dægurlagasögu Íslands – nefnilega Björgvin Halldórsson eða Bó. Hann segir það ekki kunna góðri lukku að fagna að halda sigurhátíð fyrirfram.

„Nei, ég er nú bara þannig af guði gerður, Gaflari, sem mála stundum skrattann á vegginn. Það hefur alltaf verið þannig, í tónlistarbansanum, í bisness, já bara í lífinu, bisniss, að þegar hæst standa leikar, og FH er að taka titilinn, þá gerist eitthvað. Þess vegna ber að fagna varlega. En ég veit að Svala væri verðugur fulltrúi fyrir okkar hönd. Þetta er slíkt ólíkindamál þetta Eurovision. It ain´t over til the fat lady sings. En, ég fagna þessum meðbyr og lagið er orðið mjög vinsælt. Það var tilgangurinn að gera lagið vinsælt og engum blöðum um það að fletta að það hefur tekist. Því takmarki náð,“ segir Bó.

Við Páll Óskar vorum beðnir um að fara

Hann talar frá Siglufirði þar sem hann tróð upp ásamt hljómsveit í gær. Bó segist finna mikinn meðbyr með Svölu þar. Hann er á ferð um Norðurland með athyglisverða tónleikaseríu, Bestu lög Björgvins sem samanstendur af spjalli og tónlist. Björgvin hefur hljóðritað upp 800 lög þannig af nógu er að taka en fólk getur sett fram óskalagalista á Facebook og á því byggir Bó lagalistann. En, hann mun sem sagt verða í Eurovision-samkvæmi á Akureyri þetta árið.

Bó fór út og tók þátt í keppninni árið 1995. „Ég og Páll Óskar erum einu mennirnir sem hafa ekki þurft að taka þátt í svona úrslitum. Við vorum beðnir um að fara. Ég lenti í 15. sæti. Þar var lifandi flutningur og skylda að syngja á móðurmálinu. Mátti ekkert bregða fyrir sig engilsaxneskunni. Bara sungið á íslenskunni.“

...

Uppfært 11:50

Eins og segir í fréttinni eru stuðlarnir breytilegir. Þannig var stuðull Svölu 1,9 í morgun en eru nú, þegar þetta er skrifað, kominn niður í 1,75. Þetta þýðir einfaldlega það að margir hafa veðjað á Svölu í morgun, fleiri en veðjað hafa á aðra keppendur, sem þá gerir það að verkum að stuðull hennar lækkar.