Tuttugu þúsund hafa séð Ég man þig

Aðsókn á kvikmyndina Ég man þig hefur farið fram úr björtustu vonum aðstandenda, að því er fram kemur í tilkynningu frá Senu, og hafa yfir 20 þúsund manns séð myndina nú á fyrstu ellefu sýningardögunum. Kvikmyndin er byggð á samnefndri metsölubók eftir Yrsu Sigurðardóttur í leikstjórn Óskars Þórs Axelssonar. Handrit er eftir Ottó Geir Borg, Óskar Þór Axelsson og Yrsu Sigurðardóttur.

Í aðalhlutverkum eru Anna Gunndís Guðmundsdóttir, Ágústa Eva Erlendsdóttir, Jóhannes Haukur Jóhannesson, Sara Dögg Ásgeirsdóttir, Þorvaldur Davíð Kristjánsson og Þór Kristjánsson.

Ég man þig fjallar um ungt fólk sem fer til Hesteyrar að gera upp hús um miðjan vetur en fer fljótlega að gruna að þau séu ekki einu gestirnir í þessu eyðiþorpi. Á Ísafirði dregst nýi geðlæknirinn í bænum inn í rannsókn á sjálfsmorði eldri konu.

Í tilkynningunni er þess getið að myndin hafi fengið fína dóma hjá hinum ýmsu gagnrýnendum, þar á meðal fjórar stjörnur frá útvarpsþættinum Harmageddon á X-inu, fjórar stjörnur frá gagnrýnanda DV og fjórar stjörnur frá gagnrýnanda Morgunblaðsins.

Gagnrýnandi Fréttablaðsins gaf myndinni þrjár stjörnur af fimm og má lesa þann dóm hér.