Hætt við að sýklalyfjaónæmi aukist hér á landi

Hætt er við því að sýklalyfjaónæmi aukist hér á landi og þurfa stjórnvöld að marka sér opinbera stefnu um málefni sem tengjast ónæmi gegn sýklalyfjum og sníkjudýralyfjum.

Þá þarf að vinna markvisst að því að minnka áhættuna á dreifingu sýklalyfjaónæmra baktería með ferðamönnum. Það eigi að gera með því að bæta verulega úr hreinlætisaðstöðu á ferðamannastöðum á Íslandi enda er víða pottur brotinn í þeim efnum eins og ítrekað hefur verið fjallað um í fjölmiðlum.

Þetta eru tvær af þeim tíu tillögum sem starfshópur um aðgerðir til að draga úr útbreiðslu sýklalyfjaónæmra baktería á Íslandi leggur til við heilbrigðisráðherra að ráðist verði í en hópurinn kynnti greinargerð sína um málið í dag.

Á vef velferðarráðuneytisins segir að sýklalyfjaónæmi sé „ein helsta ógn sem steðjar að lýðheilsu, matvælaöryggi og framþróun í heiminum í dag samkvæmt Alþjóðaheilbrigðismálastofnuninni (WHO). Dauðsföllum af völdum fjölónæmra baktería fer fjölgandi. Áætlað er að sýkingar af völdum sýklalyfjaónæmra baktería valdi nú þegar um 700.000 dauðsföllum í heiminum á hverju ári og að þeim fjölgi í allt að 10 milljónir á ári árið 2050 verði ekkert að gert.“

Í greinargerð starfshópsins kemur fram að fjölmargar rannsóknir hafi sýnt fram á tengsl á milli sýklalyfjanotkunar og sýklalyfjaónæmis. Sýklalyfjanotkun hjá mönnum hefur verið hærri hér á landi en á hinum Norðurlöndunum en sé miðað við öll Evrópulöndin er hún í meðallagi.

Þá segir jafnframt að algengi sýklalyfjaónæmis hér á landi hafi verið umtalsvert lægra en í nágrannalöndunum, en meðal annars vegna mikillar noktunar sýklalyfja hjá mönnum er hætta á að þetta breytist á komandi árum.

„Sýklalyfjaónæmi er minna vandamál hér á Íslandi en í mörgum öðrum löndum en annars staðar hafa verið að koma fram sýklar og bakteríur sem eru hreinlega ónæmar fyrir öllum sýklalyfjum. Það segir sig sjálft að ef einstaklingar fá alvarlega sýkingar af völdum slíkra baktería að þá er engin meðferð í boði. Þetta hefur sést erlendis og þetta viljum við ekki sjá. Þannig að útbreiðsla og aukning á svona ónæmi getur orðið verulegt heilsufarlegt vandamál,“ segir Þórólfur Guðnason, sóttvarnalæknir, en hann átti sæti í starfshópnum ásamt þeim Sigurborgu Davíðsdóttur, yfirdýralækni og Völu Friðriksdóttur, deildarstjóra að Keldum.

Greinargerð starfshópsins má nálgast hér.