Kona slasaðist við Seljavallalaug

Björgunarsveitir Slysavarnafélagsins Landsbjargar á Vík og Hvolsvelli fóru í nótt að Seljavallalaug undir Eyjafjöllum eftir að tilkynnt var um að ung kona hafi þar runnið í fjallshlíð og slasað sig á fæti allnokkuð frá vegi.

Í tilkynningu frá Landsbjörg segir að tveir hópar björgunarmanna hafi farið á vettvang en bera þurfti konuna allnokkra vegalengd svo og vaða yfir á áður en hægt var að komast að sjúkrabíl.

Það tókst um þrjúleytið í nótt og var henni þá ekið á sjúkrahús til aðhlynningar.