Hugh Hefner: Maðurinn sem synti gegn straumnum

Þegar Hugh Hefner gaf fyrst út tímarit sitt Playboy árið 1953 gátu einstök ríki bannað getnaðarvarnir að vild og bannað var að nota orðið „ólétt“ í kvikmyndinni I Love Lucy. Hann er sagður hafa dregið umræðuna um kynlíf úr skugganum og barist fyrir auknu tjáningarfrelsi og mannréttindum.

„Ef Wright bræðurnir hefðu ekki verið til, væru flugvélar samt til, Ef Edison hefði ekki verið til, værum við samt með rafmagnsljós og ef Hefner hefði ekki verið til, væri kynlíf enn þá til. En kannski myndum við ekki njóta þess jafn mikið. Heimurinn væri fátækari fyrir vikið og sömuleiðis ættingjar mínir,“ sagði Hefner árið 1974.

Hann sló svo á svipaða strengi í viðtali árið 1992 þegar hann var spurður hverju hann væri stoltastur af.

„Að ég breytti viðhorfinu til kynlífs. Að gott fólk getur nú búið saman. Að ég vann gegn hugmyndinni um ekkert kynlíf fyrir hjónaband. Ég er ánægður með það.“

Hugh Hefner, dó í gær en hann lætur eftir sig eiginkonuna Crystal Harris, sem hann hefur verið giftur síðan árið 2012, og fjögur börn. Viðhorf hans til lífsins hefur kannski best verið fangað á Playboy.com þar sem síðan hefur verið tekin niður fyrir mynd af honum og eina tilvitnun.

„Lífið er of stutt til að lifa annars draum.“

Hefner fæddist þann 9. apríl árið 1926 og voru foreldrar hans strangtrúaðir meþódistar. Hann hefur sagt að þau hafi aldrei sýnt hvort öðru ást. Hann sagði foreldra sína aldrei hafa drukkið, kynlíf hafi aldrei verið rætt á heimili þeirra og ekki hafi verið faðmast og meðlimir fjölskyldunnar kysstu ekki hvort annað. Hefner sagði að hann hafi fljótt séð hræsni í því.

Sjá einnig: Manuela og Ragga Ragnars í Playboy-setrinu

Hann byrjaði ungur í útgáfu en þegar hann var einungis níu ára gaf hann út dagblað í hverfi sínu þar sem hann ólst upp í Chicago. Árið 1944 gekk hann í herinn og skrifaði fyrir dagblað hersins. Upp úr seinni heimsstyrjöldinni hóf hann vinnu hjá Esquire og byrjaði að gæla við þá hugmynd að gefa út eigið tímarit.

Árið 1953 gáfu hann og félagi hans Eldon Sellers út fyrsta tölublað tímarits þeirra sem þá hét Stag Party. Þeir skrifuðu tímaritið í eldhúsi Hefner og innihélt það nektarmynd af Marilyn Monroe.

Nafninu breyttu þeir svo vegna annars tímarits sem hét Stag. Forsvarsmenn þess hótuðu lögsókn.

Sjá einnig: Arna og Heiðar hittu „næstum því“ Hugh Hefner

Upprunalega var fyrsta tölublaðið ekki dagsett, þar sem þeir Hefner og Sellers áttu ekki von á því að gefa út annað. Á einu ári voru lesendurnir hins vegar orðnir 200 þúsund og á innan við fimm árum ein milljón. Við upphaf áttunda áratugarins voru lesendur Playboy sjö milljónir.

Hefner bætti svo við útgáfuveldi sitt með því að stofna klúbba, koma sjónvarpsþáttum á laggirnar og tónlistarhátíðum svo eitthvað sé nefnt.

Það er gamall brandari ytra að segjast eingöngu lesa Playboy „vegna greinanna“, en þrátt fyrir orðspor Playboy um að vera klámpési lagði Hefner ávalt mikið í greinar og viðtöl tímaritsins. Meðal annars voru birt löng viðtöl við þá Fidel Castro, Frank Sinatra, Marlon Brandon, John Lennon, Martin Luther King Jr. og þáverandi forsetaframbjóðandann Jimmy Carter.

Þar að auki hafa skáldsögur eftir fræga rithöfunda, eins og Ian Fleming, Carl Sagan og Vladimir Nabokov einnig birst í tímaritinu.

Hugh Hefner varð fyrir mikilli gagnrýni á lífsskeiði sínu. Hann var ítrekað sakaður um að hlutgera og gera lítið úr konum. Nokkrar af þeim konum sem hafa komið að Playboy hafa haldið því fram að náinn vinur Hefner, Bill Cosby, hafi nauðgað þeim í Playboy-setrinu og hefur Hefner sjálfur verið sakaður um beitt kanínu ofbeldi og nauðgað henni.

Í viðtali við CNN sagði Hefner eitt sinn að hann óskaði þess að heimurinn myndi muna eftir honum sem einhverjum sem breytti heiminum á jákvæðan hátt og þá sérstaklega varðandi samfélagsbreytingar og breytingar á viðhorfi gagnvart kynlífi. Hann yrði ánægður með það.

Ætli skoðanir séu ekki skiptar með það.