Formaður ÍTF segir Leikmannasamtök Íslands fara fram með blekkingum og græðgi

Formaður Íslensks Toppfótbolta, hagsmunasamtaka félaganna í Pepsi-deild karla, segir Leikmannasamtök Íslands fara fram með blekkingum. Eins og fjallað var um á Vísi í gær gerðu leikmannasamtökin tilraun til að halda lokahóf á pari við þau sem gengið var að sem árvissum hlut þangað til fyrir tíu árum.

Formaður leikmannasamtakanna segir félögin ekki hafa lagt í kostnaðinn sem fylgi slíku hófi. Formaður ÍTF spyr hvaða leikmenn séu eiginlega í leikmannasamtökunum og telur að leikmannasamtökin hafi ætlað að græða á hófinu.

Lokahóf ofan í lokahóf 

Upphaf málsins má rekja til þess að leikmannasamtökin, undir forystu Kristins Björgúlfssonar, leituðu til ÍTF um miðjan maí. Samtökin höfðu gert könnun meðal leikmanna í Pepsi-deild karla og kvenna þar sem fram kom að um 95% höfðu áhuga á að endurvekja lokahófið.

„Þeir kynntu þetta fyrir okkur,“ segir Haraldur Haraldsson, formaður ÍTF og knattspyrnudeildar Víkings, í samtali við Vísi. Haraldur og kollegar hans hafi kannað stöðuna hjá félögunum og niðurstaðan vissulega verið sú að dæmið gengi ekki upp.

„Meðal annars af því að félögin væru hvert fyrir sig með stór lokahóf, leikmenn, þjálfarar og margir útlendingar fara strax eftir síðustu helgina og svo eru margir í verkefnum þessa helgi, enda landsleikjahelgi,“ segir Haraldur. Samtökin hafi lagt upp með komandi helgi, föstudagskvöldið 6. október, en A-landslið karla mætir Tyrkjum ytra á föstudaginn.

Ungar stelpur í Pepsi-deildinni

„Svo má ekki gleyma að í kvennaliðunum er stór hluti stelpur sem mega ekki vera á svona kvöldi. Það er eitt vandamál,“ segir Haraldur og vísar til þess hve meðalaldurinn er lágur í liðum í kvennaboltanum.

Hans stelpur, HK/Víkingur, hafi farið upp í sumar en þar sé tveir þriðju leikmanna liðsins undir aldri. Aðspurður hvernig Víkingur hafi tæklað það vandamál á eigin lokahófi, segir Haraldur að yngri stelpurnar hafi farið heim að lokinni verðlaunaafhendingu.

„Svo voru mörg önnur mál sem stoppuðu þetta strax,“ segir Haraldur. Nefnir hann ferða- og gistikostnað liða utan af landi, óljós aðkoma KSÍ að hófinu og svo væru lokahóf einstakra félaga orðin að föstum lið og fjárölfun sem færu fram engu að síður, að kvöldi síðasta leikdag í karlaboltanum.

Svör hafi borist um hæl frá Kristni þess efnis að átján ára aldurstakmark yrði á hófið og tuttugu ára aldurstakmark á barinn. Kostnaður félaganna væri metinn 5000 krónur per leikmann og unnið yrði að því að aðstoða félögin utan af landi við að fá afslátt hvað varðaði gistingu. Haraldur bendir á að 5000 krónur per leikmann eða gest þýði nokkur hundruð þúsund krónur í kostnað fyrir félög með kvennalið og karlalið í Pepsi-deildinni.

Enn var þó óljóst hvernig aðkoma KSÍ yrði að hófinu, að sögn Haraldar. Skipulagið og miðasala yrði í umsjá leikmannasamtakanna. Drög að hófinu voru þau að það færi fram í Kaplakrika, Auddi og Sveppi sæju um veislustjórn, þriggja rétta máltíð og Stuðmenn spiluðu fyrir dansi.

Náið samstarf með Guðna

Þannig skildu leiðir að mati formanna félaganna að sögn Haraldar. Ekkert heyrðist frá leikmannasamtökunum í tæpa þrjá mánuði eða þar til í lok ágúst. Þá hafði Kristinn formaður samband og tilkynnti að lokahófið, sem Haraldur segir langt í frá að hafi fengið grænt ljós frá félögunum, yrði í Gamla Bíó föstudagskvöldið 6. október.

Nú væri lagt upp með að ÍTF greiddi fyrir fordrykkinn sem væri í kringum milljón krónur í kostnað, skipt á félögin. Formenn ÍTF komu af fjöllum, töldu að hófið hefið verið slegið útaf borðinu enda ekkert heyrt í tæpa þrjá mánuði, og veltu enn fyrir sér hver aðkoma KSÍ að málinu yrði.

Kristinn hafi svarað því til að samtökin hefðu óskað eftir því að KSÍ sæi um að greiða fyrir matinn, sem væri stærsti kostnaðarliðurinn. Þeir Guðni Bergsson hefðu verið í nánu samstarfi með hófið yfir sumarið og það styttist í þeirra ákvörðun í málinu.

Ekki liggur fyrir hver kostnaður KSÍ af hófinu hefði átt að vera. En miðað við að matarkostnaðurinn var áætlaður sá dýrasti, og lagt upp með að ÍTF greiddi milljón krónur í fordrykkinn, er ljóst að kostnaður KSÍ hefði hlaupið á milljónum króna.

Komu af fjöllum

ÍTF svaraði Kristni og leikmannasamtökunum í framhaldinu. Afstaða félaganna væri sú að nánast öll félögin í efstu deild hefðu þegar skipulagt lokahóf sem færu fram 30. september. Kostnaður við þau væri mikill og ekki forsenda fyrir því að taka þátt í kostnaði við annað lokahóf helgina á eftir. Þá væri fjöldi leikmanna farinn af landi brott, ýmist í frí eða erlendir leikmenn á leiðinni heim.

Þá sögðust félögin hafa áhyggjur af því að tilkynnt væri um lokahóf á vegum samtakanna og KSÍ án þess að félögin væru upplýst um stöðu mála eða höfð með í ráðum. Lokahóf sem þetta þyrfti að liggja fyrir áður en tímabil hæfist svo félögin gætu ráðfært sig.

„Við komum gjörsamlega af fjöllum. Enda heldur enginn lokahóf án aðkomu félaganna. Einhver leikmannasamtök gera það ekki frekar en fiskbúð vesturbæjar,“ segir Haraldur.

Samþykki félaganna væri lykilatriði og þá um leið þeirra félaga sem væru með lið í Pepsi-deild kvenna.

Ætluðu að græða

Haraldur segist hafa heyrt í Guðna Bergssyni, formanni KSÍ, eftir samskiptin í lok ágúst þar sem leikmannasamtökin tilkynntu að allt hefði verið unnið í nánu samstarfi við KSÍ þótt aðkoma sambandsins að lokahófinu væri óljós.

„KSÍ og Pepsi töluðu þannig við okkur að leikmannasamtökin hefðu kynnt þetta eins og við værum með í þessu,“ segir Haraldur.

„Fyrir mér fara þeir fram með blekkingum. Þeir ætluðu að græða á lokahófinu. Þetta var aldrei með samþykki okkar,“ segir Haraldur. Öll samskiptin séu til á tölvupóstsformi ef málið þurfi frekari skýringa við.

Eftir stendur að um 95% leikmanna í efstu deildum vilja endurvekja hófið. Haraldur segir að skipulagning þurfi að vera betri og með mun meiri fyrirvara.

„Þetta er bara eitthvað sem menn þurfa að setjast yfir. Styrktaraðilar deildarinnar og KSÍ sem eiga að sjá um þetta. Hvaða leikmenn eru annars í þessum leikmannasamtökum? Það er enginn leikmaður Víkings í þessum leikmannasamtökum. Það er mjög sérstakt að reyna að koma sér svona á framfæri.“

Segir KSÍ hafa viljað koma að málinu

Upphaf umræðu vikunnar á lokahófi KSÍ voru bakpankar Benedikts Bóasar Hinirikssonar í Fréttablaðinu á mánudaginn þar sem hann gagnrýndi hvernig staðið væri að veitingu verðlauna í efstu deild. Guðni Bergsson, formaður KSÍ, mætti í Bítið og sagði vilja KSÍ að standa að veglegu lokahófi.

„Ég ræddi þetta fyrir tímabilið við fyrirliða félaganna og forsvarsmann leikmannasamtakanna þar sem var rætt um að koma þessu á. Þó auðvitað með þeim fyrirvara að það væri í samvinnu við félögin í deildinni,“ sagði Guðni.

Fundir samtakanna við fyrirliða í karlaboltanum annars vegar og kvennaboltanum hins vegar fóru fram í apríl. Var Guðni viðstaddur fundinn með fyrirliðum karlaliðanna en erlendis þegar fundað var með fyrirliðum kvennaliðanna.

Viðtal Bítismanna við Guðna má heyra hér að neðan.

„KSÍ var tilbúið að koma að þessu en það tókst einhverra hluta vegna ekki að koma þessu á legg með félögunum. Ég myndi vilja setjast niður með félögunum og ræða þetta því mér finnst vera meiri bragur á því að halda veglegt lokahóf.“

Ekki liggur fyrir hve mikla peninga KSÍ var tilbúið að setja í lokahófið. Eðli málsins samkvæmt er þann lið ekki að finna í fjárhagsáætlun KSÍ enda fór umræða um lokahófið ekki af stað fyrr en eftir samþykkt áætlunar á ársþingi KSÍ í febrúar.

Árum saman fór lokahóf KSÍ fram á Broadway á Hótel Íslandi. Að neðan má sjá myndir frá hófunum frá 2003-2007.