Samfylkingin mælist stærri en Vinstri græn

Stuðningur við Vinstri græn hefur dalað um 3,6 prósent frá kosningunum og mælist nú 13 prósent. Á sama tíma hefur stuðningur við Samfylkinguna aukist úr 12,1 prósenti í 16 prósent. Þetta kemur fram í nýrri könnun MMR á fylgi stjórnmálaflokka.

Sjálfstæðisflokkurinn mælist með 24,4 prósent samanborið við 25,5 prósenta fylgi í ksoningunum. Miðflokkurinn mælist með 10,5 pósent fylgi en fékk 10,9 prósent atkvæða í kosningunum. Framsóknarflokkurinn mælist með 9,5 prósent samanborið við 10,7 prósent atkvæða í kosningunum.

Píratar eru nokkuð stöðugir með 9,9 prósent miðað við 9,2 prósnent í kosningunum. Þá mælist flokkur fólkisns með 8,4 prósenta fylgi og bætir við sig síðan í kosningunum þegar flokkurinn hlaut 6,9 prósent atkvæða. Viðreisn helst nokkuð stöðug með 6,5 prósent en flokkurinn hlaut 6,7 prósent atkvæða þann 28. október síðastliðinn.

Einungis 60% af þeim sem kusu Vinstri græn síðast sögðust myndu kjósa flokkinn aftur ef kosið yrði til Alþingis í dag. Þá sögðust 15% þeirra sem kusu Vinstri græn síðast ætla að kjósa Samfylkinguna nú og 6% þeirra myndu kjósa Pírata. 

Af kjósendum einstaka flokka var hlutfall þeirra sem sögðust ætla kjósa sama flokkinn aftur núna hæst meðal kjósenda Samfylkingarinnar, en 91% þeirra sögðust styðja flokkinn áfram ef kosið til Alþingis í dag

Í könnuninni var spurt hvaða flokka kjósendur vildu síst hafa í ríkisstjórn. Af niðurstöðunum að dæma má sjá að stuðningur við stjórnarmyndunarviðræður Sjálfstæðisflokks, Framsóknarflokks og Vinstri grænna er æði mismunandi í baklandi flokkanna. Sem dæmi má nefna að á sama tíma og 6% kjósenda Sjálfstæðisflokksins vilja síst starfa með Vinstri grænum sögðust 57% kjósenda Vinstri grænna síst vilja hafa Sjálfstæðisflokkinn í ríkisstjórn - sem gæti verið skýringin á því að 40% kjósenda Vinstri grænna sögðust ekki myndu kjósa þá aftur.