Tuttugu tonn af kjötbollum lokuðu sænskum vegi

Ísing olli því að tengivagn flutningabíls sem var fullur af kjötbollum rann út af veginum og endaði ofan í skurði í suðvesturhluta Svíþjóðar á miðvikudagskvöld. Afferma þurfti tengivagninn áður en hægt var að draga hann upp úr skurðinum og lokuðu tuttugu tonn af kjötbollum veginum á meðan.

Óhappið átti sér stað á veginum á milli Skara og Lundsbrunn. Engan sakaði í slysinu og fóru sænskir gárungar mikinn um fréttirnar á samfélagsmiðlum, að því er segir í frétt breska ríkisútvarpsins BBC.

Þannig sögðust Twitter-notendur tilbúnir að hjálpa til við hreinsunarstarfið með hníf og gaffli. Aðrir stungu upp á að flutningabíll fullur af spaghettíi gæti fylgt í kjölfarið.