Enn ekki steytt á neinum skerjum í viðræðunum

Bjarni Benediktsson, formaður Sjálfstæðisflokksins, Sigurður Ingi Jóhannsson, formaður Framsóknarflokksins, og Katrín Jakobsdóttir, formaður Vinstri grænna, komu saman til fundar í formlegum stjórnarmyndunarviðræðum flokkanna í Ráðherrabústaðnum við Tjarnargötu klukkan 13 í dag.

Góður gangur er í viðræðunum að sögn formannanna og sagði Katrín í samtali við Heimi Má Pétursson í hádegisfréttum Bylgjunnar að ekki hefði steytt á neinum skerjum ennþá en þó sé ekki búið að landa öllum málum.

Síðar í dag munu formennirnir eiga fundi með aðilum almenna vinnumarkaðarins en þeir hittu aðila opinbera vinnumarkaðarins í gær.

 

„Við munum halda áfram að eiga samtöl við aðila vinnumarkaðarins. Við munum sömuleiðis hitta fleiri aðila til að fara yfir einstaka þætti í okkar málefnavinnu þannig að ég á ekki von á því að það verði nein niðurstaða sem liggur fyrir í lok dags heldur höldum við bara áfram þeirri vinnu sem hefur verið ágætis gangur í,“ sagði Katrín í hádeginu.

Aðspurð hvort hún haldi að viðræðurnar klárist í þessari viku eða haldi áfram fram í þá næstu sagði hún:

„Við höfum sagt að við ættum að hafa nokkuð góða hugmynd um það í lok vikunnar hvort við teljum að við getum þessu náð saman. Þetta verður auðvitað ekki tilbúið þá og ef við teljum það þá er samt töluverð vinna eftir.“