Óttast ekki hrun þrátt fyrir skarpa lækkun

Japanska Nikkei 225 hlutabréfavísitalan hefur þróast með svipuðum hætti og sú bandaríska síðastliðinn sólarhring. Greint var frá því í gærkvöldi að Dow Jones hafði, þegar markaðir lokuðu vestanhafs í gær, fallið um næstum 5 prósent á einum sólarhring sem er mesta lækkun vísitölunnar síðan í fjármálahruninu 2008.

Nikkei vísitalan hefur að sama skapi fallið um 4,7 prósent á einum sólarhring þegar þetta er skrifað. Hang Seng vísitalan í Hong Kong hefur einnig fallið um 4,5 prósent og sú suður-kóreska, Kospi, hefur lækkað um 2,6 prósent.

Hlutabréfaverð í Bandaríkjunum hefur verið að hækka almennt síðustu mánuði og hækkaði Dow Jones um meira en 25 prósent á síðast ári. Raunar var óvenjulítið um óróleika á hlutabréfamarkaði árið 2017 en vísitölur í Asíu hafa tilhneigingu til að fylgja þróuninni vestanhafs.

Sjá einnig: Mesta lækkun Dow Jones síðan 2008

Lækkun gærdagsins, og það sem af er morguns í Asíu, má í raun rekja til þess sem alla jafna væru jákvæðar fréttir af bandarískum vinnumarkaði. Greint var frá því fyrir helgi að störfum í Bandaríkjunum hafi fjölgað mjög á síðustu misserum og laun hækkað sömuleiðis. Þessi tíðindi vöktu þó nokkurn ugg meðal fjárfesta. Þá grunar að seðlabanki Bandaríkjanna muni vegna þessa grípa til meiri vaxtahækkana en gert hafði verið ráð fyrir.

Fjármálaráðgjafi sem breska ríkisútvarpið ræddi við segir að lækkunin á hlutabréfamörkuðum sé ekki til marks um yfirvofandi hrun eða trú á að allt sé að fara til fjandans. „Þetta eru áhyggjur af betra gengi en búist var við og því verðum við að endurstilla miðið.“

Hvíta húsið reyndi að slá á ótta fjárfesta um helgina og sagði að þeir ættu ekki að hafa of miklar áhyggjur af þessu tímabundnu kröggum. Mikilvægara væri að líta til þeirra þátta sem hafa áhrif á stöðugleika bandarísks efnhags til lengri tíma, þátta sem allir væru sterki en nokkru sinni fyrr.