Líst misjafnlega á nýjan flugvöll í Hvassahrauni

Helstu flugrekendum innanlandsflugsins líst misvel á Hvassahraunsflugvöll. Talsmanni Air Iceland finnst sjálfsagt að skoða þennan valkost en talsmanni Flugfélagsins Ernis finnst þetta óraunhæft. Fjallað var um málið í fréttum Stöðvar 2. 

Starfshópur á vegum samgönguráðherra hvetur til þess að flugvallarskilyrði í Hvassahrauni verði fullkönnuð sem fyrst með það í huga að þar verði bæði innanlands- og millilandaflugvöllur. 

Air Iceland Connect, áður Flugfélag Íslands, er stærsta félagið í innanlandsfluginu. Hvernig líst framkvæmdastjóra þess á Hvassahraun?

„Mér finnst allt í lagi að skoða og fullkanna þann möguleika, hvort að Hvassahraunið geti verið vænlegur kostur. Undanfarnar athuganir, á undanförnum áratugum, hafa ekki leitt það í ljós að annað flugvallarstæði heldur en hér í Vatnsmýrinni væri vænlegt.

En mér finnst sjálfsagt að skoða þennan valkost og sjá hvað kemur út úr þeirri skoðun,“ svarar Árni Gunnarsson. 

Forstjóra Ernis, Herði Guðmundssyni, líst ekkert á hugmyndina.

„Þetta er gífurlegur kostnaður á meðan ekki er hægt setja peninga í samgöngur, bara lágmarks viðbætur og endurbætur í vegakerfinu. Að vera þá að tala um að minnsta kosti hundrað milljarða, eða svo, í nýjan flugvöll einhversstaðar úti í hrauni. Þetta er bara ekki raunhæft. Reykjavíkurflugvöllur á að vera þar sem hann er,“ svarar Hörður. 

Hann hefur sagt það til háborinnar skammar hvernig búið sé að flugfarþegum í Reykjavík. 

Hugmyndir hafa verið um að reisa nýja innanlandsflugstöð skammt austan við afgreiðslu Air Iceland. En hvað verður nú um þau áform þegar kanna á annað flugvallarstæði? 

„Þó að það væri ákveðið í dag að leggja upp með nýjan flugvöll í Hvassahrauni, þá er það eitthvað sem tekur örugglega áratug, jafnvel lengur,“ svarar Árni og hvetur til þess að bætt verði úr aðstöðu flugfarþega í Reykjavík. 

Flugstöðvarmál Reykjavíkur eru hins vegar í algerri óvissu.

„Það gengur frekar hægt. Það eru ýmsar yfirlýsingar um það að menn vilji fara að byggja hér eða gera ýmislegt. En það er takmarkað fjármagn sem fylgir þeim yfirlýsingum," segir Árni. 

„Þannig að við höfum ekki séð neina sérstaka þróun í því. En það er ýmis vinna í gangi við að skoða möguleika en það er engin niðurstaða komin í það, ekki sem ég sé.“ 

-Þannig að það er engin flugstöð að fara að rísa á Reykjavíkurflugvelli á næstu árum? 

„Ég ætla nú ekki að vera svo svartsýnn. En það er ekkert sem liggur fyrir á borðinu í dag að gera,“ svarar Árni Gunnarsson, framkvæmdastjóri Air Iceland Connect.

Hér má sjá frétt Stöðvar 2: