Leita ferðamanna sem festu bíl

Lögreglan á höfuðborgarsvæðinu óskar eftir upplýsingum um hvort að einhver vegfarandi kannist við að hafa tekið upp ferðamenn sem voru búnir að festa bíl sinn í brekkunni við þjónustumiðstöðina við Þingvelli fyrr í dag.

Voru ferðamennirnir á hvítum Huyndai i10 bíl með bílnúmerið BR-X95. Vill lögregla með þessu ganga úr skugga um að ferðamennirnir séu heilir á húfi en hafi ekki farið gangandi frá bílnum þar sem veður er og hefur verið afar slæmt í dag á þessum slóðum.

Kannist einhver við að hafa bjargað umræddum ferðamönnum er viðkomandi beðinn um að láta lögreglu vita í gegnum einkaskilaboð á Facebook eða í gegnum 112.